بهیگ

تصنیف بهیگ

وُريستين وُریستين اَوردِن بَهيگه
به سَر چادر اِسبيد و اَفتو به تِيگه
دَدوم دورگَله جَم بِكُن دَور چاله
بکُوش پيش پاس گَو تو نَرميش كاله
زِ آستاره‌ها گُل بريزين به شونِس
بدين مَه و اَفتَونه سی رِی گُشُونِس
دَدوم رَو بِكُن چالِنه پُر زِ اَنگِشت
بِريزين به چاله مِله گُرگ و دينِشت

بگُوين ميشِكاله بِكَش ساز كَرنا
جِغِليَل سی بازی وُريستانه واپا
بزَن تَركه بازی و چُوپی و سَرناز
وری ميشِكال دِی بِكُن هُف مِنه ساز
بوازين و تُشمال بَرين وانياسون
بَرين خِرسَكانه وَنين زير پاسون
بَهيگه بَرين دِر بِدين دَورِ تَش کُر
بريزين به تَش زاگ اِسبيد و كُندُر

وُريستين اَوردِن بَهیگه سُواره
زِ آستاره مِيل پا و دَستينه داره
سی نُفتِس يه خالَک زِ اَفتَو بِيارين
سی گوشوارِ‌هاس مَهنه اَز رُو دِرارين
نِها تَش به کُه بِرچ بِرچ جهازِس
بِدين هر چه خواستِن ولا ايبرازِس
جِهازه بَرين و بِچينين سَرِ چُول
بخونين دُوالالی و هی گُل هی گُل

دُوانه بِگُوين رَختِ نونه به وَر كُن
وُری زيتَری گَو دِی ماله خَوَر کُن
بِزَن ميشِكال تا كه مَردُم جَم آبون
دُهُل كو بِكو گوش شيطونه كَر كُن
بِوازين سِه پا و بِگَردين به چُوپی
دُهُل كو بِكو چُوب سَرناز و تُرکی
بِگُوين هی گُل هی گُل سی بََختِ سَفيدس
بِريزين نِمک پُرِ چَشم حَسيدس