رفیق

متن آهنگ رفیق از ابوالفضل رفیعی

ای رفیق روزگار و مهربونیم کوچنی
خش زبون شویل بی همزبونیم کوچنی

 تا تو بیدی سینه مهمونی به غیر از گل نداشت
ساز و اوازی به غیر از چهچه بلبل نداشت

 آسمون او و دریا و دلم همرنگ بی
دی بلال آواز دل بی دل خشی آهنگ بی

 بید مجنون دهس سینه ی چشمه ایز تا سحر
مرغ عشقم شووشوتا پشت مالت ایزه پر

تا تو بیدی هر شکالی بی دلم خو ایگره
هر پسین کهله ی تیم گل بچه آهو ایگره

تا تو بیدی ایل کوگ و پازن و کهره شکال
بی صدای ساز و نغاره کاره ایزن دور مال

بو خش  سوزه و باوینه و نحنا و چویل
زن و زن خواس دو طیفه کل و گال ایل ایل

تا تو بیدی تیغ عشق یوسف شیرین زبون
باز هم بنجه ی زلیخا ن ایبری تا استخون

باز هم مجنون وری گل اسم لیلی ن اینوشت
باز هم لیلی و نازش جون مجنون ایبرشت

تا تو بیدی هیچ تهمت بر سیاوش نی نشهس
هیچ تیری مث تیر عشق آرش نی نشهس

تا تو بیدی پهلونی مث بیژن بی گنه
بی دوتا چشم منیژه صد چراغ ایبرد و چه

تا تو رفتی مهربونی بارش بهس و گذشت
کاسه بهره عاشقی افتاس و اشکهس و گذشت

همنشین دل گل ابی وای ای بخت خراب
کو بهار و کو جونی کو دل خش کو شراب