شند

دکلمه و متن شعر شند از کورش دورکی

دِل کَلو لیوه تونه.  چاله تَش هیوه تونه.
لیش و خُو دونِن هَمه، لیوه رَوریوه تونه.

جون سِپاره  هَندِتُم،  چی لُپُک ناوَندِتُم.
مَست لَوها سُهرِتُم. مُرده نَشم و شَندِتُم.

دُنگُلُم  دیری نَکو.   بَنگه بُو   پیری نَکو. 
ری به مو مِرزِنگِته. وا کَمون تیری نَکو.

روز و شَو به ویرِتُم. تی به رَه، مَندیرِتُم.
بالِ ره  تَش گُر کُنُم، تو بِخُی، مو میرِتُم.

سَوزِ سیرِ مِن تیات. چی چَویله پَل میات.
اَر بِخُی  سَر بِم زَنی .  جا وَنُم  تیام نیات.

اِی گُلی، شیرین زَوون. اَر‌‌ بیای اَفتَو زَنون.
جا وَنُم  به بالِ اَو.   بوسُمُت تا  بی زَمون.

گَردِنِت  دَست اِوَنُم.   ری لَواته  گَم زَنُم.
اَر بِمیرُم   هَر زَمون.  دِل زِ مِهرِت نیکَنُم.

وا یه بوسه تَونُمِت.  پَهرِ تی وا خَونُمِت.
پوره تی  ریته وَنُم.  جِنگِ خَو والَونُمِت.

تا بِگَه  بالا سَرِت،   تی کُنُم رَخته وَرِت.
تی گُشی  اَفتَو دِرا،   فِر زَنُم وا شاپَرِت.

کَلو : عاشق سرمست
رَوریوه : حیله نیرنگ
لُپُک : مهره چشم زخم
نَشم : کرشمه ناز زیبایی
شَند : سِحر افسون کرشمه نیرنگ
گُر : شعله ور
میره : شوهر
بی زَمون : اَبَد
تَونیدن : ذوب کردن
پوره : پلک چشم
جِنگ : اوج
والَونیدن : نوازش کردن
رَخت : جامه پوشاک
سوزه سیر : رنگین کمان
بِگَه :. پگاه، صبح زود