بلا

متن دکلمه و شعر بلا از کورش دورکی

سوزِ غَم  سُه بَرگ و پَر، وابی تَلِ هُل.
بادِ غِر  زِی ری بُهون، وَندِس سَرِ چُل.

جیکُری  تی رَه  بَهار   اَفتَو به پیشِس.
سَهمِ لِف زِی به لِکِس چُم‌ زِیدِ ریشِس.

بِشتِ هین ری فاشِ دِل پوکه سِتَم زِی.
ری چَرِس زِی بادِرو، اِشکَست و نَم زِی.

هَرسِ دِل   فِرفِر کُنه  ری هاکِ وَسته.
فاشِ گُل   تا پِرکِ سَر  به گِل نِشَسته.

چاله تَش   پِرپِر کُنه   لَمپا  اَبی کور.
آرِزو    مُردِن  کُنه   باوینه  سَر گور.

دِهگَها     خَرده تَنَه  ،   کَلگَه وُریده.
کَهکِشون مِن چاله شَه  تالِس بُریده.

اِی خُدا    وابی بَلا   شادی زِ هونه.
تی پِر و   دَرمونِ خَو  گُل گوزِرونه.

کِی دیه    وارَستِنه   تَشگَهنِ بینیم.
مِن دِل و  مِنجا تیا، فینجه اِچینیم.

دُهدَری   لَولَو کُنه   به جُستِ گیلَک.
کُر پِلی  مِنجا شَهی  مَنده خُسه تَک.

تی  رَهه   باوینه  تَر،   گیلَک وُراهه.
هَر کُجه  سیل اِزَنی  سَد گُل دِراهه‌.

کوروش دورکی بختیاری

تَل : تپه
هُل : خاکستر
باد غر : گردباد
چُل : سنگچین زیر چادر عشایری
جیکر : نهال
سَهم : ترس تهدید
لِک لشک : شاخه
لف بشت : باران رگباری
چُم : شبنم برف، سرمای شدید
پوک : پتک
چَر : ساقه
بادرو : بوران
فرفر :: بارش نم نم
پِرک فاش : شکوفه
پرپر : سوسو‌ زدن
لمپا : فانوس
تَنَه : دوده
کلگه وریده : کاخ ویران
تال : ریسمان سررشته
بَلا : گم شدن
پِر : خیره
گل گوزرون : گل گاوزبان
وارستن : رهایی آزادی
فینجه : جرقه آتش
لولو : بغض همراه گریه
گیلک : لاله واژگون
کُرپِل : پسر تنومند