نیمه شو

متن شعر و دکلمه نیمِ شَو از کورش دورکی

نیمِ شَو تی به رَهُم وا دَرد و غَم، بِم سَر بِزَن.
پا  تَشُم چی پِرپِروک،  اِی دُنگُلُم  زی دَر بِزَن.
چی پیار،   اَر تَش گِرُم،  بالا سَرُم  پَرپَر بِزَن.
اَر مونه  نیخُی بِگو ،  دِشنه مِنه  تی تَر بِزَن.
نازِلو،   تا   زِنده یُم،  مونه  بِخُو،  بیَو  دیار.

لاش و دِل آبیدِ هُل ری هَرسِ تی وَسته به رَه.
هَرسِ تی  وابیده لِف، دَروَنده  هین، نیبو بِگَه.
هینِ سُر کِرده زِمین سُهرونِ تَل،  تی کِرده چَه.
آسِمون   تاریک و  کِر،  وابی جُدا  اَفتَو  زِ مَه.
دَردُمه   به کی  بِگُم،  نیاَشنه کَس ،  ناله  نِیار.
...
اِی خُدا به گُل بِگو که بیکَسُم، دِل هینه خَرد.
کیک و چِر وَیده کِلُم، شَو پَهرِ تی بارونِ دَرد.
جا نَنی ایچو مونه، مِنجا شَوه تاریک و سَرد.
مونه وا   اَندوهِ  دِل   تِهنا  نَنی،   وابیده زَرد.
چه بِگُم تا که نَری، تَن  بی دِزه، دِل بی سِتار.
....
به خُدا،   وا رَهدِنِت،   دیندا رَسه  به زیوَشُم.
بَختِ شه شَوگارِ شَه، شَوکورِ تی، که ناخَشُم.
چَنده وا به زِنده اي مِن بیکَسی سَختی کَشُم.
مَرگِ مو   تَهل و چِزار،  اِی داغِ دِل  سیاوَشُم.
چه بِگُم، وا مو نَبی، نَه تیگِ خُو، نَه بَختِ یار.

کوروش دورکی بختیاری

پرپروک : پروانه
پیار : خار و خاشاک
دیار : آشکار پیدا، سر زدن
لِف : باران شدید
بِگَه : پگاه صبح
سهرون : مکان پوشیده از خاک سرخ
تَل : تپه
کِر : مه آلود
نِیار : افسرده افسردگی
هُل : خاکستر
کیک و چِر : شیون و زاری
بی دزه : ناسالم، ناخوش
بی ستار : بیقرار ناآرام
زیوش : عمر زیستن
چزار : حسرت افسوس
تیگ : شانس اقبال پیشانی