کهیگ محیط زیست

متن شعر و دکلمه کهیگ محیط زیست از کورش دورکی

#نه_به_شکار_کوگ_و_پازن

#لری کُهیگ    

پازِنون‌    وِیدِن تُلُم    به کوهِ زَرده.
ری به گَل  تیری نَوَن  بِهلین بِگَرده.

کَوگِ دَر   داره گُنَه   چی بیگِ ریوَر.
اَر تَری   تیری بِوَن    ری به سِتَمگَر.

پازِنی     زَر چَمبَری    وِیده دیاری.
تیرِ سُر  ری بِس نَوَن،  که تیرِداری.

کَوگِ دَر    وا تیشِتَر    وِیدِن سَرِ اَو.
تیرِدار   به جونِ کُر،  تیری نَکُن هَو.

پازِنون لاز و رَشِن، کَوگون یَه رَنگِن.
روز و شَو   دارِن پَرَک،  سَهمِ تُفَنگِن.

مَر دِلِت یاهه کُشی  جوندارِ نَشمین.
مَر لَوَر به واره وِی، یا بِت گُده دین.

کَوگِ دَر ، پازِنِ کُه، مَر چه گُنَه داشت.
تیرِدار  اَز تیرِ سُر   مِنجا دِلِس کاشت.

اَفتَوه    مُل به کَمَر   ری  شاخِ  پازِن.
جونِ دُر، تیرِس مَزَن، تا که چَره شِن.

گُد خُدا   اَر کَس کُنه   کَوگی شکالی.
جون خُس نیبَخشُمِس تا مَنده سالی.

بیگِ  نَر    وِی  وادیار   آرو  تِله لا.
تیرِته     هالی  بِکُن     به  آسِمونا.

دیدی اَر دو بیگ و بُز  به اَوهَرِنگه.
بِس نَوَن    تیرِ تُفَنگ،   اَفتَو نِهِنگه.

سَر نَکَش ویرون نَکُن، جالئزه پازِن.
کَوگِ دَر،  پازِنِ نُه، کِی بیده دُشمِن.

اَر تَری    تیری نَوَن   دیدی کُهیگه.
تیرِ بُز،   ری تاشِ پَر،  مَندیرِ بیگه.

اَر تَری    به گِل بِنه     تیر و تُفَنگه.
کَوگِ رَش تیری نَزَن، نَشمه غَشَنگه.

تو بِوین   پازِنِ رَش  به کوهِ فردون.
مَر دِلِت یاهه زَنیس اِی شاهِ مِردون.

نَه خُدا  خوشِس اِیا، نَه پیر و دالو.
کَوگِ دِر ،  پازِن خُرِن،   تیرِ  شِکالو‌.

پازِنون دارِن چَرِن، کَوگون خُرِن اَو.
تیرِ سُر  بسون مَزَن، دیوون بِده دَو.

پازِنی   جَرنیده سَر،   دیده شِکالو.
داده دَو    پیر و خُدا،   اَشنیده آلو.

کَوگِ دَر،  پازِنِ هَفت، اَر مُرده ریگِن.
سی زِمین دَرواسِ یِن، جونِ کُهیگِن.

اَر کُهیگ  آبیده تار،  اَر  بی زِهِشته.
تَش نَوَن، تیری نَزَن، چینکه بِهِشته.

کوروش دورکی بختیاری

کُهیگ :: کوه زیست، بز کوهی، صید شکار، محیط زیست
تُلُم، گَل  :: گروه دسته همراه، سردسته
بیگ : بزغاله
ریور : نوزاد
تیردار، شکالو ::: شکارچی صیاد
لاز : خال روی بدن ، نشانه
رش : خاکستری مایل به سیاه، زیبا
پَرَک :: هوش و حواس
سَهم :. تهدید ترس
نشمین : زیبا دلربا
لَوَر : قحطی، مخفیگاه
شِن : نام درختی
آرو :: نمای دور و مبهم
تله لا : صخره صاف و بلند
اَو هَرنگه : محل آب خوردن گوسفند کوهی
نِهِنگ : نزدیک
جالئز : مکان امن و آرام، جای خواب
تاش : صخره
پَر : صخره کنار کوه رو به پرتگاه
دالو : پیززن
آلو : عقاب
دَو دادن : دشنام و کفر و ناسزا  گفتن
مرده ریگ : میراث دار، وارث
تار : جدا افتاده، فراموش و گم شده
زهشت : آرام و قرار، دم و نفس
دَرواس :  لازم؛ احتیاج؛ دربایست ضروری

#نه_به_شکار_کوگ_و_پازن