پَرتَو

متن شعر و دکلمه پَرتَو از کورش دورکی

مَرتِ دِلُم بَسکه کَشه دَرد و سِتَم زی رِکِهِست.
زَهم و کُرَو زَیده تَنُم، گیلَکِ دِل  زی مولَهِست‌.
....
دیه  نیا   واره  بَهار،    اَر  که  دِلُم   پَر  نَکُنه.
پِرکِ  دِلُم   نیزَنه  دَر،   تا  خَشِ  به  وَر نَکُنه.
....
تیگِ شَهُم  روز و شَوُم کِرده غَمین،  تار و کِرِ .
اَفتَوِ  دِل  زَید و دَرَه،   مَنده  شَهی  زار و پِرِ .
...
بَختِ  خَشی  اَر  نَوُرا،   هَرسِ  تیا   زی  اِدِرا.
بِشت و لِفی باره به دِل،  لُورَو هین   تی اِگِرا.
...
شور و دَره   پَهرِ دِلُم   کَهنه زِ هین   تا بَرِ خَش.
هار و دِرِن، وِیدِ زِ رُه به دِل تِکه، جون زَنه تَش.
...
اَر که خُدا  بُردِ زِ ویر روز و شَوُم، بَختِ خَشُم.
دُنگُلِ دِل  ری بِکو‌ بِم، کُن به وَرُم  رَختِ خَشُم‌.
...
اَر که بیا  یار و گُلُم، واره دِلُم  سَوز و پُر اَو.
اَر که نَیا  یا که نَخو، بَختِ اِدُم دِشنُو و دَو.
...
رَهده پَرَک ری به گُلُم، یارِ خوشی ری به دِلُم.
تا که خُدا  زِنده کُنه  مَست و کَلو،  مَهنه کِلُم.
...
زَیدِ تَنَه  ری  دِلِ مو، بَختِ شَه و دَر به دَرُم.
گُرزِ سِتَم زَیدِ کُرَو، ری تَن و ری تیگ و سَرُم.
...
واره نَزاره دِل و جون، بی اَو و زَورونِ لِزار.
مُرد و دَرَه  مِهرِ دِلا،  نیکَشه  سَر   سَوزِ بَهار.
...
مَندُمِ  تِهنایِ  غَمین،  کَوگِ دَری  که بیکَسُم.
پَرتَوِ  دِل داده دَفَر ، که  زیتَری  بِت  بِرَسُم.
...
دُنگُلِ   بیوارِ  دِلُم،     هُمبَر   و  نازارِ  مونی.
تَهل و  اَرازه  مِنِ دِل،  تو  تَشِ شَوگارِ مونی.

اَر بِگِری  دَستِ مونه،  دَردِ مو  دَرمون  اِکُنه.
تا که خُدا رَخِت خَشی، یاره به وَرمون اِکُنه.

مَرت : پوست، لایه
مولهستن : پژمرده شدن
رِکِهِستِن :: خراش برداشتن ، زخمی شدن پوست 
کُرَو : تاول
گیلک : لاله واژگون
پِرک : شکوفه
کِر : منزوی، مه آلود
پِر : خیره
نَوُرا : برآورده نشود
بشت، لف : باران شدید
لورو، لفو : سیلاب
دنگل : معشوق
دشنو : دشنام
دَرَه : غروب کرد
دَو : کفر و ناسزا
پَرَک : هوش حواس، اندیشه
کَلو : عاشق سرمست
تَنَه : دوده
زورون، لزار : خشک و بی آب و گیاه، کویر
پَرتَو : صبر تحمل شکیبایی
دَفَر : فرصت
بیوار : غریب
اَراز : بغض و اندوه شدید